KOMUNIKADO DI PRENSA
No. 2013/005

Selikor NV
Fecha: 4 yüni 2013
Tópiko: Riba dia di Medioambiente Selikor ta regalá skol di fundeshi 7500 agènda eskolar
Telefon: 434-1349/Faks: 465-6964
wèpsait: www.selikor.com

Riba dia di Medioambiente Selikor ta regalá skol di fundeshi 7500 agènda eskolar

Djarason, 5 di yüni, dia di medioambiente, Selikor a hasi entrega simbóliko di su agènda eskolar na representantenan di diferente skol di fundeshi. Di un forma espektakular a presentá e agènda eskolar ku e kompania a laga produsí i ku tin un diseño úniko. Loke ta hasi e agènda spesial ta ku e ta den idioma hulandes i papiamentu. E agènda ta kontené masha hopi informashon i tepnan valioso riba tereno di limpiesa di nos isla i riba e tópiko di resiklahe.

Selikor a laga produsí un kantidat di 7.500 di su agènda pa e aña eskolar 2013-2014. E agèndanan aki lo bai keda entregá grátis na e diferente skolnan di fundeshi. “Mi ta kontentu ku nos por a realis’é. Hopi bunita e la keda, mi ta satisfecho. Dia nos a kuminsá mi mes no a pensa ku lo e bira algu úniko i kolorido asin’aki. Bo ta mira Selikor bèk den dje”, asina direktor general di Selikor sr. Wesley Kook a bisa.

Den su plan di maneho Selikor tin komo un di su metanan prinsipal, duna mas kontenido na e funshon sosial di e kompania den komunidat. E kompania konstantemente ta konsientisá, en espesial, nos hóbennan riba aspektonan di maneho di shushi i riba tereno di resiklahe. Tur esaki pa nos por yega na un isla mas limpi. “E proyekto aki ta fet presis den e kuadro aki pasó e ta dirigí riba formashon di nos futuro generashon. Ku e proyekto aki Selikor ta demostrá ku akshon ku nos ta care pa e komunidat di Kòrsou” segun Wesley Kook.

Ku e proyekto aki Selikor ta dal un paso konkreto den e direkshon di forma un brùg entre maneho di shushi i edukashon. Banda di traha riba e konsenshi pa un Kòrsou mas limpi i bunita e kompania ta duna un aporte grandi na enseñansa.

“Pa e siguiente añanan eskolar, ken sa, kisas un otro empresa por sigui e ehèmpel aki. Lo ta un kos mahestuoso si nos por pasa e konsepto ofer na un otro organisashon. Pasó na final di kuenta esnan ku mester sali benefisiá ta nos muchanan” asina sr. Wesley Kook ta finalisá bisando.