KOMUNIKADO DI PRENSA
No. 2014/005
Selikor NV
Fecha: 13 di yüni 2014 2012
Tópiko: Caribbean Recycling Company (CRC) huntu ku United Wheels i Ballast Nedam Curaçao NV a yega un akuerdo pa konstruí Hospital nobo ku material resiklá
Telefon: 434-1349/Faks: 465-6964
wèpsait: www.selikor.com
Caribbean Recycling Company (CRC) huntu ku United Wheels i Ballast Nedam
Curaçao a yega un akuerdo pa konstruí hospital nobo ku material resiklá
Djabièrnè 13 yüni 2014, den sala di ouditorio di Selikor NV, Selikor huntu ku United Wheels NV i Ballast Nedam Curaçao NV a firma un akuerdo pa konstruí hospital nobo na Otrobanda usando materialnan resiklá ku ta keda generá den e konstrukshon aktual.
Kòrsou konosé pa años kaba fasilidatnan pa prosesá shushi di konstrukshon manera piedra, blòki i betòn. Aktualmente na CRC, ku ta un kompania di Selikor NV, ta prosesá gran parti di e shushinan aki i ta resiklá un parti di dje pa konstruí e.o edifisio.
Meta dje MOU ta pa un koperashon entre e kompanianan ariba menshoná di forma ku por hasi uso di e propio material ku ta keda generá for di área di konstrukshon di e hospital nobo na Otrobanda. E materialnan aki ta bai CRC situá na Malpais, Lèntfel. CRC na su turno ta prosesá e materialnan aki di tal forma ku nan lo por wòrdu uza pa konstrukshon di e mesun hospital nobo na Otrobanda. 
Ku e inisiativa aki e tres kompanianan ta demostrá un biaha mas ku ora pone man huntu, logronan grandi lo keda realisá. Ta e intenshon pa e kompanianan aki asistí otro ku nan konosementu kon pa prosesá e materialnan ku e fin pa resiklá. Esaki ta un paso mas den direkshon pa yega na un medioambiente mas sano i duradero i realisá un produkshon di materialnan di konstrukshon mas limpi i ekonómiko.
Riba e foto athunto por mira momentu ku direktor di Selikor sr. Wesley Kook, direktor di United Wheels NV sr. Carlos Pardo i direktor di Ballast Nedam Curacao NV sr.Rene Overdevest a firma e MOU
