KOMUNIKADO DI PRENSA
No. 2015/007
Selikor NV
Fecha: 14 di ougùstùs 2015
Tópiko: Selikor ta duna trabou na 14 persona desempleá
Telefon: 434-1349/Faks: 465-6964
wèpsait: www.selikor.com
Selikor ta duna trabou na 14 persona desempleá
kumpliendo ku su responsabilidat sosial ku komunidat di Kòrsou
Selikor NV, konsiente di su responsabilidat sosial, na aña 2014 huntu ku e Ministerio di Desaroyo Sosial, Trabou i Bienestar (SOAW) a start ku un proyekto ku e meta pa krea trabou i redusí desempleo bou di prinsipalmente nos hóbennan. E proyekto a enserá ku un grupo di desempleado a haña e oportunidat pa, durante un período di 1 aña largu, presta labor na e kompania di maneho di shushi.
Na inisio di e proyekto e partisipantenan a risibí algun treinen intensivo ku a konsistí di un parti teorétiko i un parti práktiko. A introdusí e konsepto di funshon multi-disiplinario den kua e partisipante por a traha den práktikamente tur e departamentunan operashonal di Selikor NV. Tur treinen tabata na di enkargo di profeshonalnan ku ta laborá na Selikor NV mes. Di e forma aki e partisipantenan por a haña eksperensia di trabou general i den un funshon na Selikor NV en partikular.
Ku hopi satisfakshon e kompania ta partisipá ku, di e 16 personanan ku a partisipá na e proyekto, un total di 14 a sa di presta di forma satisfaktorio segun kriterionan i eksigensianan ku e kompania a stipulá adelantá. Konsekuentemente e 14 personanan aki a risibí un kontrato di trabou di 1 aña ku posibilidat pa prolongashon i por yama nan mes entrante ougùstùs 2015 un trahadó di Selikor NV. Selikor ta mira atras riba un proyekto hopi eksitante ku no solamente a benefisiá e kompania riba tèrmino kòrtiko sino ku riba tèrmino largu ta bai benefisiá komunidat direkto i indirektamente. 14 mama i tata di famia a haña un fuente di entrada permanente i ekonomia di Kòrsou ta haña un empuhe, aunke ta chikí, komo resultado.
Pa Selikor NV e proyekto aki ta un komienso di un vishon ku e kompania tin pa, huntu ku otro kompanianan di gobièrnu i sektor privá den koperashon ku e Ministerio di SOAW, yega na un fórmula pa krea mas empleo i redusí e tasa di desempleo di tal forma ku tur partido ta benefisiá di esaki. Na final di kuenta kada empresa aki na Kòrsou ta forma parti di e komunidat aki i tin e deber di aportá den tur forma posibel na bienestar di nos komunidat. Selikor NV ta yama danki na tur ku a hasi e proyekto eksitoso aki posibel. Un bes mas ta keda demostrá ku “huntu nos ta logra”.
