KOMUNIKADO DI PRENSA
No. 2018/007
Selikor NV
Fecha: 26 di febrüari 2018
Tópiko: Selikor ku kara nobo den Marshe Nobo
Telefon: 434-1349/Faks: 465-6964
wèpsait: www.selikor.com
Selikor ku kara nobo den Marshe Nobo
Djaluna 26 di febrüari Selikor a kuminsá risibí klientenan bèk na e unidat ku Selikor ta hür den Marshe Nobo. E trabounan di remoledashon na e fachada a kulminá i por bisa ku esaki a trese un bista hopi bunita den nos Marshe Nobo: un kara nobo den Marshe Nobo.
Na e unidat akí, ku por wòrdu konsiderá un filial kompleto, klientenan por akudí pa atendé tur asuntu ku ta regardá Selikor su servisio i produktonan i tambe por paga pa esakinan. Diaramente, sigur esnan ku ta trafiká ku transporte públiko, ta hasi uso di filial akí den nos Marshe Nobo. Ku e fachada nobo akí ta muchu mas fásil pa klientenan mira unda Selikor ta situá i ta muchu mas agradabel pa atendé nan asuntunan.
Selikor ke stimulá tur otro empresario, grandi i chikí, ku ta hasi uso di Marshe Nobo pa ofresé nan produkto i servisio na públiko, pa nan tambe sigui e ehèmpel akí di forma ku huntu ku Fundashon Marshe nos Marshe Nobo por haña un aparensia aun mas bunita i organisá.
Nos ta warda tur nos klientenan na nos filial den Marshe Nobo na e orarionan kustumbrá. Kòrda por spar i troka Fun Miles tambe serka nos.
