KOMUNIKADO DI PRENSA
No. 2018/024
Selikor NV
Fecha: 12 di desèmber 2018
Tópiko: Retraso den servisio di rekohé shushi gròf grátis
Telefon: 434-1349/Faks: 465-6964
wèpsait: www.selikor.com
Retraso den servisio di rekohé shushi gròf grátis
Selikor NV ta partisipá ku e kompania ta eksperensiando algun retraso den su skema di rekohé shushi gròf grátis. E retraso akí tin hopi di haber ku e kantidat di shushi gròf ku nos komo habitante ta saka, den e periodo di fin di aña, kompará ku normal. Konsiente di esaki e kompania ta hasiendo su máksimo esfuerso pa no laga ningun bario keda ku nan shushi.
E skema pa rekohé shushi gròf grátis lo keda adaptá kombiná ku e skema normal den luna di desèmber. E siman akí lo traha pa eliminá e retraso den zona 1 ku zona 2. Pa otro siman lo traha den área di zona 3 i zona 4. Pa mas detaye di kada zona ku indikashon di bario por wak e skema ku a keda publiká riba e página di facebook òf subi e websait di Selikor.
Selikor lo trata pa rekohé tur loke ta shushi gròf grátis, ku habitantenan a pone pafó segun e skema ku a publiká, promé ku dianan di fiesta binidero. Pa kaba ku eventual retraso lo traha tambe den fin di siman pa rekohé shushi gròf grátis.
Habitantenan ku tuma nota ku Selikor a pasa den nan bario pero no a bai ku nan shushi gròf, ku nan a pone pafó promé ku Selikor a pasa, por tuma kontakto ku nos departamentu di Servisio na Kliente na 434-1300.
Gerensia ta pidi su diskulpa pa eventual inkonbeniensia ku e retrasonan akí por trese kuné i ta pidi su klientenan indulgensia i komprenshon.
