KOMUNIKADO DI PRENSA
No. 2019/007
Selikor NV
Fecha: 22 di aprel 2019
Tópiko: Selikor ta planta fruta, yerba i berdura pa nos grandinan riba dia Dia di Mama Tera i fiesta di Seú
Telefon: 434-1349/Faks: 465-6964
wèpsait: www.selikor.com
Selikor ta planta fruta, yerba i berdura pa nos grandinan riba dia Dia di Mama Tera i fiesta di Seú
E aña akí un bes mas Selikor NV ta para ketu na e fecha 22 di aprel ku ta dia ku internashonalmente ta selebrá dia di Mama Tera. Pa duna kontenido na e selebrashon Selikor NV a bini ku un proyekto pa komunidat na kua 18 kas di kuido ta partisipá. Apertura ofisial di e proyekto akí a tuma lugá na kas di kuido Zorg en Hoop, riba dia di Mama Tera, ku e aña akí a kai mes dia ku na Kòrsou nos ta selebrá marcha di Seú. Direktor general di Selikor NV sr. Wesley Kook, kompañá pa miembronan di direktiva i personal di Zorg en Hoop, a planta un palu di Granatapel pa mustra ku plantando nos ta yuda konservá nos medioambiente. Zorg en Hoop ta un kliente di Selikor NV for di aña 1996 i ta pa e motibu aki a hasi e apertura na e kas di kuido akí.
Banda di duna atenshon spesial na Mama Tera, ta hasi uzo di e dia internashonal akí pa konsientisá komunidat riba importansia pa protehé nos planeta i konservá biodiversidat. Tambe ta para ketu na aspektonan di kontaminashon i konservashon di rekursonan natural. Riba nivel internashonal e enfoke di e aña akí ta riba protekshon di espesienan ku ta den peliger di ekstinshon. Un aspekto ku lo por kontribuí na redusí e chèns di ekstinshon di espesienan den peliger ta plantamentu di mata. Mata por alimentá tantu e ser humano komo e fauna. Ademas plantamentu di mata lo sòru pa kontinuidat di e diferente espesienan di flora. P’esei Selikor NV a skohe e aspekto akí di e totalidat pa duna atenshon na dje.
Intenshon di Selikor tras di e proyekto akí ta pa inspirá suidadanonan pa planta palu i kuida nos tera. Solamente ku plantashon i kuido, nos tera por ta fértil. E aña akí a pone nos grandinan den lus dor di planta un palu di fruta òf berdura na kada kas di kuido ku ta kliente komersial di Selikor. Kosecha di kada palu ta bira kuminda pa e kas di grandi ku e lema...loke nos planta awe nos ta kosechá mañan. Huntu ku i rondó di e plantamentu, ku riba su mes ta un akshon di durashon kòrtiku, a diseñá un wega di Bon Kuné ku ta kuadra ku e okashon (ku e tópiko di mata di fruta i bèrdura) pa tene e grandinan aktivo i selebrá dia di Mama Tera ku nan. A opsekiá kada kas di kuido, banda di e palu ku Selikor a planta, un e bará di Bon Kuné i un sèt di dominó pa nan por sigui usa.
Selikor NV ke stimulá komunidat den su totalidat i otro kompanianan en partikular pa nan tambe duna nan granito na protekshon i konservashon di Mama Tera.
