KOMUNIKADO DI PRENSA
No. 2019/009
Selikor NV
Fecha: 5 di yüni 2019
Tópiko: Selikor ku bishita na skolnan di fundeshi den kuadro di dia di Medioambiente
Telefon: 434-1349/Faks: 465-6964
wèpsait: www.selikor.com
Selikor ku bishita na skolnan di fundeshi den kuadro di dia di Medioambiente
Djarason 5 di yüni, dia mundial di Medioambiente, un tim di Selikor tabata di bishita na dos skol di Fundeshi, St. Paulus College i Berg Carmel College. Meskos ku hopi otro organisashon rònt mundu, Selikor tambe ta para ketu na e dia mundial di Medioambiente. Tema di e aña akí ta: ‘Polushon di airu’.
Durante e siman di 3-7 di yüni e tim di Selikor lo bishitá un total di 10 skol di fundeshi, kaminda lo duna un seshon di informashon na grupo 5, 6, 7 òf 8 den kua lo para ketu na konsekuensia di shushedat riba nos kalidat di airu. Na kada skol un total di sigur 60 alumno lo risibí un presentashon oudiovisual i hopi interaktivo.
Meta di e bishita na skolnan di fundeshi akí ta pa krea konsientisashon i stimulá akshon individual pa kuida nos medioambiente. E akshonnan individual mester kontribuí na krea un plataforma kolektivo pa realisá un medioambiente mas duradero i garantisá un futuro próspero i sigur pa tur nashon i ser humano.
Di parti Selikor nos lo sigui krea oportunidat pa informá komunidat den su totalidat i asina un dia nos por logra e Kòrsou ku nos ke, un isla limpi i bunita.
