KOMUNIKADO DI PRENSA
No. 2019/010
Selikor NV
Fecha: 2 di ougùstùs 2019
Tópiko: Selikor ta regalá komunidat pintura di morkoi, ganshi, palabrua, kinikini, gabilan piskadó i warawara
Telefon: 434-1349/Faks: 465-6964
wèpsait: www.selikor.com
Selikor ta regalá komunidat pintura di morkoi, ganshi, palabrua, kinikini, gabilan piskadó i warawara
Komo parti di Selikor NV su programa di konsientisashon pa stima nos pais i tené limpi, e artista di arte mural Garrick Marchena a finalisá resientemente e di 6 pintura mural ku nos kompania a regalá komunidat. E pintura mural akí ta situá den e bario di Montaña Abou, nèt na muraya di skol di fundeshi Angela Jessurun. Ta trata akí di un pintura di un warawara ku ta simbolisá kurashi i balentia.
Na aña 2016 Selikor NV a kuminsá apliká un fórmula di konsientisashon diferente den kua, hasiendo uso di arte, a bin ta konsientisá i motivá nos hóbennan riba importansia di un isla limpi. Ku e instrumento di arte, Selikor NV kier a logra alabes elevá e sentido di patriotismo i engrandesé nos amor pa pais; si abo stima bo pais bo ta tené limpi. Den kuadro di esaki Selikor NV a aserká e artista di arte mural Garrick Marchena pa huntu ku hóbennan di diferente bario krea 7 obra di arte mural.
A determiná ku e obranan mural lo bini na áreanan konosí pa bashamentu ilegal di shushi. E arte mural lo sirbi pa hasi e área unu bunita, krea un sentido di community, subi trafikashon di outo i hende i subi e drèmpel pa dúmp shushi. Bou di guia di Garrick Marchena e hóbennan ku a partisipá a risibí un tayer kòrtiku den kua nan a siña téknikanan básiko di pinta i fèrf.
Entretantu ya a finalisá un total di 6 pintura. E promé pintura di muraya ta un morkoi ku a bini den e bario di Otrobanda, den Kurá di Shon Ki. Siguidamente a sigui pa e bario di Boca Samí ku un pintura na e muraya di e vèlt di Jong Colombia. Aki hóbennan di e bario, bou di guia di Garrick Marchena, a yuda pinta un ganshi. Na Rif, pegá ku e muraya di Banko di sanger, por apresiá e di 3 pintura ku ta un palabrua.
E di kuater pintura a bini na Seru Papaya. Riba e muraya grandi parti patras di e kasnan di Fundashon kas Popular a bini un kinikini. Den bario di Marchena, na e vèlt di Shon Ki Nicasia, a bini un gabilan piskadó i na Montaña Abou a bini un warawara, na muraya di skol Angela Jessurun. Próksimamente lo sigui pa realisá e último pintura mural ku lo bini den e bario di Soto dilanti di Kolegio Don Sarto.
Selikor NV ta sumamente satisfecho ku e resultado di e obranan mural te ku awor i ta hopi orguyuso ku nos hóbennan di bario tambe por a duna nan aporte na realisashon di esaki. Nos ta spera ku komunidat lo sa di apresiá kada mural i lo sòru pa mantené e área rondó di esaki limpi.
