KOMUNIKADO DI PRENSA
No. 2020/002
Selikor NV
Fecha: 25 di yüni 2020
Tópiko: Selikor ta distansia su mes for di e komportashon di trahadónan ku a partisipá na manifestashon
Telefon: 434-1349/Faks: 465-6964
wèpsait: www.selikor.com
Selikor ta distansia su mes for di e komportashon di trahadónan ku a partisipá na manifestashon
Pa medio di e komunikado akí Selikor NV ta informá di ta distansiá su mes for di e komportashon di trahadónan di e kompania ku a partisipá na e manifestashon resien. Apesar ku gerensia tin komprenshon pa algun di e motibunan tras di manifestashon, no ta akseptabel ku ta hasi daño na propiedatnan privá òf públiko.
Djarason, 24 di yüni 2020, durante di e manifestashon ku a sali for di Post 5 rumbo sentro di suidat komunidat por a opservá un grupo di trahadó di Selikor ku tambe a uni nan mes na e marcha. Selikor, meskos ku Kòrsou den su totalidat, ta pasando dor di retonan finansiero i tin komprenshon pa e doló di e pueblo i di trahadónan. Sinembargo bou di ningun situashon ni sirkunstansha Selikor por aseptá ku un manifestashon ta kaba den vandalismo, ladronisia i violensia.
Selikor pa medio di e komunikado akí ta kondená e komportashon di algun trahadó i ta distansiá su mes kompletamente for di esaki. Ku repudio gerensia a tuma nota di diferente video ku ta sirkulando den kua klaramente por mira trahadónan den unifòrm di trabou kousando destrukshon den sentro di suidat. Di ningun manera no por hustifiká esaki, sigur teniendo kuenta ku den kaso di Selikor gerensia ta hasiendo tur ehersisio nesesario i te ainda a logra salbaguardiá kuponan di trabou i pago di salarionan mensual. Gerensia lo bai manda un señal kla na su personal ku tipo di komportashon ku ta trese e kompania den lus negativo no ta aseptabel i lo bai aktua kontra di esaki.
Gerensia di Selikor ta hasi un súplika na tur partido envolví pa laga sano huisio prevalesé i drenta diálogo ku otro. Huntu nos lo por sali for di e situashon akí i krea mihó perspektiva pa nos tur. Selikor ta pidi komunidat pa karga ku nos den e temporada difísil akí i ta sigurá komunidat ku ta hasiendo lo máksimo pa normalisá e servisio mas pronto posibel.
