KOMUNIKADO DI PRENSA
No. 2020/007
Selikor NV
Fecha: 18 di òktober 2020
Tópiko: Selikor ta duna inisio na siman di medioambiente
Telefon: 434-1349/Faks: 465-6964
wèpsait: www.selikor.com
Selikor ta duna inisio na siman di medioambiente
Pa algun aña kaba, e di tres siman di luna di òktober, ta selebrá siman di medioambiente aki na Kòrsou. E aña akí e siman di medioambiente ta kore di 19 pa 23 di òktober i pa duna inisio na siman akí Selikor NV a duna honor póstumo na sra. Gladys van Dal Mc Kenzie plantando un palu di Tabebuia na e parke na Trasbordo Koraal Specht. Na mes momentu a dediká e parke na e persona aki.
Planta Palu
E plantamentu di palu, tur aña riba 18 di òktober ku ta fecha natal di Gladys, ta forma parti di un programa edukativo di Selikor NV. Pa Selikor esaki ta un manera simbóliko pa sigui stimulá komunidat den su totalidat pa stima nos medioambiente i yuda protehá esaki. Sra. Gladys, banda di duna un aporte den diferente organisashon sosial i di medioambiente, tabata konosí pa su akshonnan di planta mata. Semper el a enfoká riba e importansia di planta palu pa perservashon di nos medioambiente i tambe pa yuda nos bestia – i paranan pa haña mas kuminda i mihó ambiente di biba.
Parke Gladys van Dal Mc Kenzie
Ku e vishon di sra. Gladys van Dal di felis memoria den mente, Selikor a dediká e parke riba tereno di Trasbordo di shushi na Koraal Specht na su persona. Entrante 18 di òktober 2020 e parke ta karga e nòmber di Gladys van Dal-Mc Kenzie. Un parke ku anteriormente tabata destiná pa un área di resiklahe awor lo bai sigui desaroyá den un parke pa e bira unu multi funshonal i den airu liber. Un área atraktivo pa bishitá ku e meta pa rekreá, pa duna workshop i instrukshon riba tópikonan ku tin di haber ku limpiesa en general i kuido di nos medioambiente. E pensamentu tras di tur loke Selikor ta hasi pa ku desaroyo di e parke ta segun e filosofia di bida di sra. Gladys van Dal.
E diseño di e parke Gladys van Dal-Mc Kenzie lo bini ku un base di resiklahe teniendo kuenta ku aspektonan di durabilidat. Ta e intenshon pa den rekonstrukshon di e parke uza diferente material ku por resiklá ku e meta pa konsientisá di por mira shushi ku otro bista i realisá kiko tur nos por hasi ku un material ora ku no tin uzo mas p’e.
Desaroyo di e parke lo ta den fase, bou di enkargo un hóben arkitekto, Shawn Zimmerman di Studio Diseñá. Sra. Van Dal semper a kere den nos hóbennan i tabata di focus pa ku nan desaroyo positivo. Netamente pa esaki e eskoho di e hóben arkitekto akí.
Selikor NV ta spera ku mas organisashon por sigui duna ehèmpel akí i kontribuí na kuido di nos medioambiente.
