KOMUNIKADO DI PRENSA
No. 2022/008
Selikor NV
Fecha: 12 di yüli 2022
Tópiko: Selikor ta den kombersashon ku sindikato pa start bèk ku servisio di rekohé shushi di kas
Telefon: 434-1349/Faks: 465-6964
wèpsait: www.selikor.com
Selikor ta den kombersashon ku sindikato pa start bèk ku servisio di rekohé shushi di kas
Djaluna, 11 di yüli, durante henter dia Selikor a hiba kombersashonnan ku sindikatonan ABVO i BTG pa atendé diferente punto di preokupashon di trahadónan. Awe den dia lo sigui sinta na mesa pa trata di haña otro mas pronto posibel di forma ku e servisio di rekohé shushi di kas por start bèk.
Manera ya a bini dilanti den medionan di komunikashon, djaluna mainta e resiente gerensia interino di Selikor a wòrdu konfrontá sorpresivamente ku e hecho ku un grupo grandi di trahadó di ophaal no a sali bai laborá. Manera ta e práktika usual den Selikor e gerensia interino (ku a sinta riba 1 di yüli 2022) a tuma kontakto mesora ku e sindikatonan pa tende di nan kiko ta pasando.
Durante e kombersashon ku sindikatonan nan a indiká ku e malkontentu ta trata diferente punto di preokupashon ku ya nan tin tempu kaba ta trese dilanti. E gerensia interino a splika sindikatonan ku nan tin apenas 6 dia di trabou sintá pero ku ya nan a kuminsá atendé e problemátikanan agudo di kompania. Aki a menshoná ku ya den e dianan anterior a reuní na varios okashon den seno di tim di maneho pa atendé dos prioridat. Ta trata akí di e problemátika di disponibilidat di e trùk i e aspekto di komunikashon na komunidat. Den fin di siman ya komunidat por a nota un kambio pa loke ta trata e último akí.
Tambe e gerensia interino a pensa diferente senario i strategia pa atendé ku e reto di piesanan ku ya a manda buska for di eksterior i ku, debí na tardansanan mundial den e sektor di transporte, ainda no a yega. Mas aleu a splika e sindikatonan ku e vishon ta pa durante e pròksimo 3 pa 4 añanan ku ta bini pasa na remplasá tur aña 3 trùk di shushi i agregá 3 na e flota. Di e forma akí por yega na un flota optimal di mínimalmente 20 trùk i asina por redusí i te hasta eliminá e trahamentu di warda anochi ku tambe ta un punto di doló pa e trahadónan. Tur esaki naturalmente saliendo for di e punto di bista ku gobièrnu lo bai kumpli, manera primintí, ku pagonan na Selikor.
Durante e dia di awe lo sigui sinta na mesa ku sindikatonan. E meta final ta pa huntu sali for di tur eventual impase na bienestar di tantu komunidat ku ta meresé un mihó servisio komo nos trahadónan ku aktualmente ta dunando lo máksimo bou di sirkunstansianan desfaborabel.
Gerensia interino ta pidi komunidat diskulpa pa e situashon ku a surgi akí ku a influenshá e retraso ku ya kaba tin den rekohementu di shushi di kas. Selikor kompletu ta trahando ku determinashon pa yega na un solushon i alivio.
