KOMUNIKADO DI PRENSA
No. 2023/004
Selikor NV
Fecha: 20 di aprel 2023
Tópiko: Shushi peligroso ta kousa eksploshon den trùk di shushi di Selikor
Telefon: 434-1349/Faks: 465-6964
wèpsait: www.selikor.com
Shushi peligroso ta kousa eksploshon den trùk di shushi di Selikor
Resientemente personal di Selikor, riba labor pa rekohé shushi a konfrontá ku un situashon sumamente peligroso. Tabata un kaso den kual un persona a pone bòm di gas ku ta usa pa èrko den un kliko. Na momento ku e personal a basha e shushi for di e kliko den e trùk esaki a kousa un eksploshon.
Ku e informashon akí Selikor ta hasi un súplika na tur hende pa deshasí di nan shushi di un forma responsabel. Esaki no ta konta pa solamente shushi di kas sino tambe shushi di kompania. Diariamente e personal di Selikor ta konfrontá kasonan den kual personanan ta pone shushi ku no mester bai den un kliko.
No ta tur shushi por bai den kliko. Artefaktonan di material flamabel, shushi médiko, zeta, fèrf i shushi kímiko sigur no por bai den kliko. Den hopi kaso riba e produkto òf material tin indikashon ku no por tir’é den ko’i shushi. Un kliko ta destiná pa solamente depositá shushi di uso di kas òf di kompania.
Den kaso di kompania, shushinan ku destinashon industrial no por bai den kliko. Na momentu ku mester deshasí di tipo di shushi ku no por bai den kliko, mester informá na Selikor kon pa deshasí di esaki di un forma responsabel. Selikor ta ofresé diferente forma den kual por deshasí di diferente tipo di shushi di un forma responsabel. Tin kaso ku por reusá òf resiklá material. Pa tur esaki Selikor por duna instrukshon kon pa prepará e shushi.
Laga nos para ketu i pensa riba e importansha pa deshasí di shushi na un forma responsabel. Si nos no hasi esaki e por tin konsekuensia fatal pa nos mes. Banda di esaki bo tin e personal ku ta atendé direktamente ku e shushi i mester kòrda riba nan protekshon.
Komo e kompania ku ta hiba maneho di limpiesa, nos tin e responsabilidat pa duna asistensia den rekohementu di shushi. Selikor por hasi esaki solamente ku yudansa di komunidat ku ta deshasí di nan shushi di un forma responsabel i yuda protehá nos personal.
