KOMUNIKADO DI PRENSA
No. 2024/002
Selikor NV
Fecha: 6 di febrüari 2024
Tópiko: Selikor ta inisia ku trabounan di limpiesa pa aña 2024
Telefon: 434-1349/Faks: 465-6964
wèpsait: www.selikor.com
Selikor ta inisia ku trabounan di limpiesa pa aña 2024
Na inisio di novèmber 2023, Selikor a start ku trabounan di limpiesa. E trabounan a keda repartí den 3 fase pa kubri Kòrsou kompleto. Ya kaba na diferente área na Kòrsou, aktualmente ruta di karnaval, nos por a ripará e trabounan di limpiesa ku a keda hasí.
E trabounan di e promé fase a dura mas tantu di loke a plania pa terminá na desèmber 2023. Aktualmente e trabounan di limpiesa ta konsentrá riba tur e ruta di karnaval. Den e promé fase akí a inisia limpiesa den mas ku 79 persela di kual 33 ya a konkluí ku limpiesa riba kamindanan prinsipal, plenchi, rotònde, áreanan públiko. E limpiesa di 33 persela a produsí 178 ton di shushi.
Despues ku terminá ku fase 1, lo kontinuá ku fase 2. Fase 1 a ensera e area di Zegu te ku Westpunt. Fase 2 ta kubri área di pariba di Korsou, ku ta Brievengat te ku Seru Machu. Den e área akí tambe nos ta papia di limpiesa di 97 persela. Selikor ta konvensí ku e kombersashon ku ta andando ku gobièrnu lo kana positivo di forma ku por kontinuá ku e trabounan di limpiesa i por kubri Kòrsou kompleto. Ta e intenshon ku Selikor por inisiá den fase 3 ku e trabounan di limpiesa riba kamindanan prinsipal, plenchi, rotònde, áreanan públiko den di 3 kuartal di aña 2024. Fase 3 ta kubri e parti mei mei di Kòrsou.
Tur esaki lo nifiká ku durante aña 2024, tur bario lo yega na turno pa ku e trabounan di limpiesa. Habitantenan di e diferente barionan lo bai ripará e trabounan den e barionan ku ta na turno.
E trabounan di limpiesa lo wòrdu ehersé dor di 135 kontratista i organisashonnan di bario kende nan lo bai involukrá entre otro habitantenan di e bario i grupo di hendenan ku aktualmente ta sin trabou. Den e proyekto di limpiesa aki por nifiká ku sigur 835 hende lo tin trabou pa un temporada definí, durante 1 aña ku ta bai tin limpiesa i mantenshon di e áreanan indiká.
Selikor ta pidi tur habitante pa duna espasio na e tim di limpiesa pa nan por hasi nan trabou di forma optimal. Despues ku e trabounan di limpiesa finalisá e apelashon ta pa kada habitante yuda mantené e área rondó di nan kas limpi. Habitantenan mester realisá e importansha i nesesidat pa nan mes yuda mantené nan bario limpi. Esaki ta parti di nos kada un su responsabilidat síviko pa ku nos pais. Si nos kada un hasi esaki nos por garantisá un Kòrsou limpi, manera nos ke. Selikor ta konta ku un i tur su kolaborashon pa di e forma akí yuda mantené Kòrsou liber di shushi.
Un apelashon na kada organisashon, grupo di persona ku tin intenshon pa plania un akshon di limpiesa, fabor di tuma kontakto promé ku organisá e trabounan di limpiesa. Finalmente Selikor ta konta riba koperashon di outomobilistanan pa tene kuenta ku trahadónan ku ta laborando kantu di kaminda i baha velosidat den áreanan den kua e trabounan ta tumando lugá.
